Per l'Egeria que me butèt aquí, sus la tèla,

Quand vendràs vièlha un ser a la candèla,

Te trufaràs pas pus del paure de ieu, Ò malonèsta!

Que te caldrà cavalcar lo teu de monta-mameta!



dimanche 14 novembre 2010

Los Ga-Ga..., los Ga-Ga..., los Gau-Gau..., los Gaullistas!


VOS AI COMPRÉS !!!
Sètz totes Gaullistas.

   Sufisiá d'agachar la television aqueste 9 de novembre per se'n persuadir.
   I a un dire que se ditz:
Cal nàisser per èstre polit,
Se maridar per èstre ric,
Morir per èstre brave.
   O avèm verificat fa pas gaire per la mòrt del Pofre, vesèm que s'aplica encara quaranta ans après lo decès. Lo Grand a fach lo plen de lausenjas, aqueste dimars.
D'unes jornalistas se son daissats anar a lo comparar a Loís lo quatorzen o a Napoleon Ir. Quinas referéncias! Un qu'atalentèt França tota, per petar dins de la seda a Versalha, l'autre que podiá pas caupre dins sa pèl e que te saquèt lo fuòc a la mitat d'Euròpa!
Mesfisatz-vos dels pichons!
   Encara, que siái pas tròp plaçat per desparlar d'aqueste darrièr. Cal dire que mon aujol, lo Peire, siaguèt reformat al conselh de revision de l'Empèri, qu'èra tucle coma una taupa e que vesiá pas res d'aicí-alai. Privat de la campanha de Russia, en 1812, crompèt los tenements dels vesins que per còp d'astre, avián bon pè, bon uòlh, e se posquèron faire tuar per la mai granda glòria del corseton nervolhós. Aital faguèt fortuna, e, es a n'aquela epòca que la familha venguèt bonapartista!
   Mas lo vent a virat, e siái sortit d'una ostalada paura qu'aviá pas la television, luònh se'n mancava, quand s'atudèt lo Grand. Una vesina de la mameta, qu'èra dins lo benaise, aviá comprat un pòst, en negre e blanc evidentament, e me convidèt lo dijòus seguent per agachar las aventuras de Zorò, lo rainal mascat. Èri dins mos cinc ans. Grand gaug que me faguèt, lo còr me fasiá tifa-tafa, aviái la petelega d'i èstre...
   Mas, lo dijòus seguent, Zorò es pas jamai arribat. Las doas cadenas de l'O.R.T.F. retrasmetián en dirècte las enterralhas dau despenja-figas!


   Se n'i a fòrça uòi que dançan amb la musica e que son gaullistas sens saupre de que ne vira, ieu o siái pas e sabi perqué!!!

5 commentaires:

  1. Auviguei un jornalista d'Europe 1 parlar dau costat sòrne de De Gaulle (de segur, se faguet insurtar per los autres jornalistas). Pertant, auria obludat quauquaren de fòrça important... Privar los dròlles de Zorro es un crimi contra l'umanitat (o tot-parier l'enfància). Paures dròlles... :-D

    RépondreSupprimer
  2. Pensas que dèvi portar lo pet alprèp de la Cort Europenca dels Dreches de l'Òme? Sabi pas pus ont penjar mon lum. Mas es verai que dempuòi aqueste trist eveniment seguissi una terapia que me menèt dins las reünions setmanièras de la Melania per ne parlar (Bonjorn Domenge...) Benlèu que m'acontentariái d'una penedença de la familha...

    RépondreSupprimer
  3. Cada matin en me levar, benedisi la Melania per far bloguejar sos estudiants (entre autras causas demai).
    E se me demandatz per quina rason, aqueste blòg n'ei una de las bonas. Espèri que durarà mai d'una annada.

    RépondreSupprimer
  4. Vos ne grandmercèji e demòri bocabadat, çò que o me cal reconóisser es puslèu quicòm de rar!

    RépondreSupprimer
  5. Una voseta al fons de la sala me ditz que "benedisi" es un gasconisme (de benedíser) e que se ditz pas en lengadocian. Me cal dire benesissi, si, si! Doncas, es corregit :).

    RépondreSupprimer