Per l'Egeria que me butèt aquí, sus la tèla,

Quand vendràs vièlha un ser a la candèla,

Te trufaràs pas pus del paure de ieu, Ò malonèsta!

Que te caldrà cavalcar lo teu de monta-mameta!



mercredi 1 juillet 2015

La Saucissa-pride

Es de mòda ara, dempuòi que los Occitans que sèm an mes sul mercat internacional son « Ten te fièr », totes còpian e fan sa pride. Pride d’aicí, pride d’ailà, a tu te vòle, a tu te vòle pas !...
E l’autra prima, a París, èra la veggie pride, valent a dire la manif de la fiertat vegetariana, los manjaires de pastura per las carrièiras dau grand vilatge escanaire.
E doncas per rasonar un pauc e se montar la carrèla sus l’accion brosenta dels brostaires d’ensaladas, vejatz-aquí vòstre Montamametas afavorit atacar aquela còrda, pas que per lo plaser de pachaquejar e de dire de mau dau vesin. Encara que lo vesin, colesterolizat dusca a las galhas, siague un carnassièr de la còsta plena e puslèu carnuda, de l’esquipòt plan tibat, un cantoral de la rebola florida que fai gaug de veire.

Primièirament e deontologicament, coma un bon Montamametas que se respiècha, s’assabentar per saupre de qué ne vire. E, coma qualificar en lenga nòstra aqueles erbivòrs d’un genre novèl ?
« Mistral, Mistral-lo-bèl, diga-me Ò grand Mistral la paraula que conven ! »
Canta Manon ! L’ enciclopedic Tresor dóu Felibritge demòra mut coma una sarda e boca barrada aquí dessús, ne parla solament pas. E de rasonar. A beles uòlhs vesents, ges de mots dins nòstra lenga per qualificar aquela practica modèrna, inimaginabla per nòstre Prèmi Nobèl e, o cau reconóisser, de mal concebre per nautres ! Ges de mots per dire un concèpte encara mai fumós que la mecanica quantica, lo caòs original o lo boson de Higgs que, en s’esquichant un pauc la comprenèla e en se despegant los neurònis, se pòdon, en comparason, entendre aisidament, e mai per las borronas demest vosautres qu’an derrabadas mai d’èrbas d’agram que de rasigas cairradas.
Nos contentarem doncas per los qualificar de seguir los diccionaris modèrns que, tornant a la sorga, qu’aquela idèa caluga nos ven, se cau pas estonar, de l’Anglatèrra Victoriana,  optan totes per vegetarian. Podèm pebrar un bricon la salça, fai mestièr, en parlant de Brostaires de jolverd, de Mastegaires de roqueta, de Romiaires de sòja, de Cogolertofils, de Pissan-verd o Cagan-mòl, o mai leugièr, de Vent-los-empòrta. Ne vòs, n’as. Ne traparètz, ne siái segur, a semaladas.

Amusat e, o me cau confessar, un chic admiratiu davant tant de privacions que s’impausan aquel mond, agachave lo desfilat de la manif sus l’internet, quand, atupit e macat, comprenguère en legissent los eslogans, que, non contents de manjar pas de carnifalha, volián pas que los autres se ne congostèsson. Chabal de boçut, aquò passa l’òsca !

Lor vòle doncas rementar qu’es al moment, dins lo temps que Bèrta fialava e benlèu un pauc abans, que l’omo erectús a manjat de carn que la diminucion de son cais a daissat 30% de plaça en mai per son cervèl e qu’es vengut, mercé las proteïnas, intelligent. Cau, de segur, relativizar mas las grandas maissas, que nòstre pòble n’es claufit, nos en pòrtan, ailàs, pròva cada jorn. E, se cau un exemple, pas qu’un, citarai lo baug mai bèl que la tèrra aja jamai portat, Itlèr, l’oncle Adòlf, que s’adonava al vegetarisme. No coment coma dison ara en bon francés.

Me siái daissat dire tanben que d’autres estanciurs de la meteissa farina nos vòlon faire manjar deman formigas, sautarèlas, prègadieus, cigalas provençalas o grelhs roergasses !!! M’agrada mai a ieu de tutar lo grelh a l’anciana puslèu que de ne faire d’astilhas grasilhadas, tugar lo verm e m’encigalar d’un autre biais !

L’ora dau rampèl, de la crida per una contra-manifestacion me sembla d’aver picat. Montarem pas a París per rendre l’omenatge segon l’usatge ancian mas treparem la vila santuari per totes los Occitans de nauta grana, La Cauna. La manif partirà dau restaurant de « la Panolha Comola », plan planet, aprèp lo penequet dau dinnar e prendrà l’avenguda qu’es en penda doça e a l’ombra, fins l’ostau de salason Milhau que s’i tendrà la minuta de silenci. Arribada prevista davant lo secador trionfant e tasta dau Cambadjon-Plan-Conogut per l’aperitiu dau sopar.
Per totas entresenhas, podètz contactar lo CAC, Comitat d’Aparament de la Carnsalada, qu’afortís que la santat passa per lo bonaür e que lo bonaür es d’engolir, al minimum, 5 carnsaladas diferentas per repais. Matin, miègjorn, e ser. E lo dimenge, podètz faire quatre oras !

CAC - 40,  baloard dau Fricandèu - 81230 LA CAUNA.



Aucun commentaire:

Enregistrer un commentaire