D'aquí la fin de l'annada, vos cal un minimum de 30 articles, un article, aquò fa
15 linhas minimum en occitan (mas o caliá precisar?). Vos cal pas m'escriure
los 30 articles d'un còp... Ensajatz de variar los tèmas.
as aquí lo prètzfach plegat. Òc-ben, de Gardarem las Mametas a Gardarem lo Caçolet n'as trenta, trenta esquichaments de comprenèla per ne tirar pas qu'aquò, aquela substantifica mesolha, aquel chuc galejaire o que se voliá aital.
Me devi rendre a l'evidéncia, dins los recontorns de las tripas de mon cap i a pas que trufariá e colhonitge. Es atal.
Çò mai bèl d'aqueste blòg, es fòra d'aquí que lo cal cercar, dins los rencontres que congreèt, (encontrèri en verai d'unes legeires que conoissiái pas!), los escambis que ne siaguèt l'encausa, (aicí Ràdio Mametas sus Lengadòc!) e l'espèri, mai que mai, ..., la nòta de las bonas que se va empegar!
Èra pas ganhat, luònh se'n manca que d'un pauc mai sabiái solament pas çò qu'èra un blòg, e me vaquí afogat, dependent, passejant cada ser dins lo mond bèl dau bloguitge coma òm fai sas crompas, una lectura d'aquí, un comentari o una video d'alai. Me cal aprofièchar d'aquela mena de conclusion per mercejar los que me faguèron l'onor de legir mon desborronatge e l'amistat còp o autre de daissar un comentari intelligent per faire montar lo nivèl.
M'arrèsti a tot jamai, ai passadas las quinze linhas.
Se m'engani pas, èra pas dich qu'èra obligatòri d'arrestar lo blòg a la fin de l'annada (ni après). Alara, sèm a esperar la tornada dau blogaire.
RépondreSupprimerLa remarca es senada, mas èra pas dich non mai que la nòta seriá suspenduda, ad vitam aeternam, a l'esperlongament dau daquòs.
RépondreSupprimerVertat es qu'ara per ara es pas tant aisit, digús per me metre lo cotèl a la gargamèla o lo còp de pè al cuol per me forçar a m'escampar sus la tela, ont o cal dire vos petaçatz plan sens ieu.
Pasmens i tornarai, pas que pel plaser aqueste còp, lo temps de me renovelar los imatges e serai mai dels vòstres.